精神健康體驗館反思導賞會

《備忘錄》與說書人 @storytalerhk 合辦了一場針對青山醫院「精神健康體驗館」的「反導賞」活動，收穫許多參加者的深入觀察和獨到批判。此帖文匯聚了當日集思廣益的成果，歡迎讀者在留言繼續與我們交流，一同反思本地關於精神健康的主流論述，構想能有效推廣精神健康的策略！

參加者發言精華

關於展館整體論述

參加者 Peipei，修讀犯罪學：

展館唔係消除緊精神健康面對嘅污名，而係推銷緊青山醫院。例如話精神病以前要坐監、用電擊治療，而家食藥就有得醫、醫院會收容你、連用家都話體驗ok，講到精神醫學好似好進步咁。解説萬句不離「食藥就好返」,太線性，其實排斥緊唔想靠藥物尋求復元嘅人。

關於展館選材

參加者 G：

我喺展館睇唔到「精神健康」，佢描述嘅都係「病」，好medical。其實精神健康有好多嘢講，唔係淨係病，而係一個光譜。

參加者 WYK，大律師

精神健康挑戰係生命中嘅一個歷程，人人都會經歷起伏同狀態好壞。

明明精神健康係眾人之事，但展館將「有病／冇病」劃清界線，似乎強化緊大眾嘅誤解，認為精神健康挑戰好可怕、唔正常。

關於幻覺體驗及解説

VR房整到好似遊戲室咁，職員係咁催我哋去「玩」，但冇事先警告有咩內容，其實有可能觸發創傷反應。

個體驗好獵奇，令我覺得同精神病人好唔同。

有朋輩支援工作員話自己嘅復元全靠食藥，仲好感激青山嘅醫生督促佢。佢有正面經歷當然好。但過分強調食藥，忽略其他復元方法，會變相鞏固精神醫學嘅霸權。

分享前線工作日常

參加者 P，職業治療師：

我喺青山實習時，留意到前線同事因為工作繁重、長時間身處精神病院環境，容易失去耐性，難以騰出空間去體察服務使用者。就算想處理得更人性化都唔容易：有次同院友做職業治療，我問上級除咗洗衫、執餐具等，可否安排冇咁悶同重複嘅活動畀佢哋，可惜最後都安排唔到。有啲practice本身就係咁，唔係你話想郁就可以郁到。

有時前線同事未必為意自己嘅用詞唔恰當。譬如有護士會話院友「乖」，言下之意即係佢聽話準時食藥、冇唔尋常嘅表現或舉動、容易管理。「乖」其實好難聽。但呢啲係大家喺精神科制度下讀書、工作習得而來。而且快啲discharge先符合醫院嘅目標。咁嘅氛圍好容易令佢哋變得麻木。

如果展覽要真能夠反污名

唔好咩都交晒畀醫生。譬如可以探討面對壓力，我哋可以點樣互相支援，營造友善嘅環境。

介紹症狀應該以常見、生活中會接觸到為原則，而唔係聚焦最煽情或標奇立異嘅嘢。

理想嘅展覽，應該能夠拆解普遍嘅stigma。

希望有空間畀精神醫學嘅 survivors敍述自己嘅創傷同經歷，凸顯復元嘅多樣性。

---

親歷經驗分享

牙咩 | #新手社畜 #十年精神病歷, 入過一次青山 #可能算係倖存者？？#ACG 宅宅

醫療成效 404 not found 症候群

病友大部分時間留喺大廳，全程由護士監管，督促我哋食藥、同確保我哋人身安全。住院兩星期，見醫生先得幾分鐘，開嘅藥同劑量 都同以往一樣，亦冇人協助我建立出院後面對情緒困境嘅能力。何來有治療？

醫院環境封閉、高度規律，反而不利復元！

住院期間，我被逼同自己嘅人際網絡隔絕晒。我嘅興趣同排解情緒嘅方式，例如畫嘢、寫作、聽歌、自由閲讀 . . . 通通都被限制。

成個概念就係要我哋慪喺度，最緊要唔好死=.=

不但冇專心養病嘅效果，仲令人好難適應>.<

妄想自己係動物園主管失調症

深刻感覺係好似隻畜牲咁，畀醫護人員圈養，而唔係當作一個完整嘅人咁看待。

永遠監視住我哋一舉一動：連廁所都有窗口望入嚟，淋浴間直頭冇門。有時醫護仲會對病友評頭品足 , 甚至嘲笑，譬如話 :「個癲婆嗌夠未呀！」，「排骨精又唔食嘢喇！」

問題癥結

唔係失德咁簡單，而係醫院呢個全控機構入面，專業人士係有絕對權力。所以醫患不平等、講嘢唔理人感受、唔解釋治療方法等等，全部都係自然而然嘅事。

BTW，點解

冇人通知我,

原來我可以

自簽出院 ???

病 =冇人權？

病友所有嘅行為同情緒表現，都會被醫護人員用病理嘅濾鏡去解讀，令我哋必須壓抑自己，扮到又乖又平靜。因為入院而悶悶不樂好正常，但護士就好擔心我係咪抑鬱。我表現得開朗啲，佢又問我係咪太躁狂。有次有個女仔喊得好犀利，就畀護士綁咗落床 . . . . . .我哋好似做咩都有問題咁。

我只想脫離病情, 情緒不過係人性

治療精神病嘅地方 , 情緒感受反而係更加需要收埋 , 先可以證明自己係正常 ， 醫生可以放我出去。你話幾荒謬 ?

身處扮正常呢場無了期等待中，先係最折磨人嘅心志。

任意使用權力成癮

醫院環境又悶又高壓，令我好想嘗試唔同方法幫自己提振心情。 但醫護 嘅權力真係無孔不入。

譬如醫院啲衫又頹又唔啱身 , 我會摺起衫袖同褲 腳，令自己望落唔好咁柒，可以盡量掌握同表達自我。

僅此而已，都要畀姑娘鬧 : 「你當呢度 ？ 明明已經係無關人身安全嘅事。」

醫院生活，堪稱冇電腦都可以玩踩地雷 “- . –

咩都無法自主決定、生活每方面都被監控、要扮正常嘅環境，令我嘅情況不但冇好轉，出院後一直壓抑嘅情緒更大爆發，治療經歷亦成為我其中一個創傷。

明明係一個醫病嘅地方，

反而令人更加病、更加受傷，

真係弄巧反拙，超級諷刺。

精神病院最大嘅作用，似乎係收埋嗰啲佢哋認為係社會炸彈嘅人，令市面上少咁一個不穩定因子，確保我呢個痴線佬唔會危害社會、唔會自傷。

要撼動制度同改變主流論述好難，無論青山定係精神健康體驗館都唔會一下子解決晒所有問題。但好高興我唔係孤軍作戰，唔係因為自身經歷先覺得展館有問題。今次活動可以凝聚到同樣關注精神健康嘅人，分享觀察同想像，就算我對制度冇乜寄望，都未至於對人類絕望 ?!?!