「難道沒練習太耐」工作坊早前順利完成，MEMO同FLUID好多謝大家嘅參與🥳當日重頭戲之一，就係一班男仔分組聽三位女仔輪流講心事，再俾回應，心事嘅範疇包括咗外形、事業同埋人際關係👥
小編觀察到好多唔同嘅溝通門派，有理性分析派、有不斷鼓勵派，亦都有輕鬆互動派，於是節錄咗其中一啲回應，同大家一齊討論吓～💭
＊「有時人生就係咁。」
＊「會過㗎，時間會沖淡一切。」
＊「我明白啊。」
＊「點解唔試下XX或者YY呢？」
＊「我都有過類似嘅經歷⋯」
＊「見到你已經好努力⋯」
＊「如果我係你，我都會覺得⋯」
＊「我可以同你理性分析一下⋯」
溝通未必有劃一嘅方程式，唔知大家有心事嘅時候，又會傾向聽到對方邊一種回應呢？💬如果有心事嘅一方係男仔或者女仔，大家嘅回應方式又有無唔同？你哋鍾意聽到對方處理咗自己情緒先、提供分析同建議，抑或有其他方法，令到對方感受到自己認真聆聽？
我哋幾位成員喺工作坊後，都各自整理咗啲反思，想同大家分享、討論～🙌🏻
💬「有時聽到啲套語會心情一沉，譬如『人生就係咁』、『時間會沖淡一切』，但萬一時間沖唔淡呢？ 即使時間真係沖得淡，但當刻嘅情緒又確實存在，或者都需要正面處理，唔淨係展望將來～」
💬「聽到對方同自己講『我明白啊』會覺得安心，但如果對方聽咗一陣就講『我明白』嘅話，我反而會覺得對方唔係太明白。其實『唔明』都好正常的，有時直接表達自己『未明』，再慢慢問落去，相信可以再理解多啲！」
💬「換位思考真係超重要，但係換位之前都需要多啲嘅了解。如果我換入對方嘅處境，覺得食甜品可以減壓，但可能對方其實唔中意甜嘢。所以換位前嘅一步，應該包括埋好好了解～」
💬「我有時聽朋友傾訴，都會心急埋一份，好想俾多啲建議對方。但我會問自己，對方係需要表達情緒，定徵求建議。如果對方已經嘔吐式地吐緊情緒，我就會覺得佢最需要嘅唔係建議，而係接住佢嘅情緒先。」
💬「我自己同好多男仔一樣，都希望有個情緒穩定嘅女朋友，唔想成日處理情緒危機。但有時我都會諗，生活之中有情緒其實好正常，唔一定係情緒危機。如果今次唔處理好，反而怕日後真係會積累成真正嘅危機。」
💬「喺關心朋友之前，或者先關心自己都係一個好嘅開始！好好接受同肯定自己嘅所有情緒，都會幫我哋易啲理解到其他朋友嘅情緒。 」
人際溝通離唔開跌跌撞撞，小編們都成日撞板，今次舉辦工作坊亦有唔少改善空間🙏🏻希望我哋都有勇氣面對同檢討自己嘅問題，反思之後，再一齊成為更好嘅聆聽者同回應者啦！❤️🔥
發佈留言